مرحبا  ..
من فترة وأنا أحاول أكتب تدوينة عن حياتي التعليمية , وعن الأخطاء الي وقعت فيها وعن أشياء عديدة ..
ماكنت متحمس كثير لفكرة التدوينة , ولكن الآن لازم أكتب عنها

قبل عام تخرجت من الثانوية العامة , طبعاً مع الأسف الشديد التوجية الجامعي بالنسبة لي كان معدوم تماماً !
لا من المدرسة ولا من المجتمع ! كانت الفكرة العامة للأغلبية .. قدم ع الجامعة وأدخل أي تخصص وخلاص !
ما كنت أعرف أي شيء عن التخصصات وطريقة الدراسة , ومجالات العمل مستقبلاً لهذي التخصصات , إذا سألت أحد عن تخصص معين كان يجاوبون بـ ( مشي حالك بأي تخصص ) !

قررت على ” كلية الهندسة ” .. وللأسف ماحالفني الحظ لأسباب جداً تافهة و أولها طريقة التقديم البدائية جداً في الجامعة الي تعتمد على أرقام وطوابير .. ماكان عندي خيار لأي جامعة أو كلية في السعودية غير الباحة ..
لسبب واحدة , وهو ” الوالدين ” الله يطول بأعمارهم للأمانة ماأعترضوا على فكرة سفري لأي مدينة .. وكان القرار لي بالأول والأخير .. لكن المشكلة أخواني كلهم خارج الباحة ,  فـ من الصعب جداً يكونوا ” الوالدة والوالد ” بروحهم في الباحة وهم في هالسن الكبير

طبعاً في الجامعة .. كانت جميع التخصصات مفتوحة أمامي بإستثناء الهندسة طبعاً ,  ما كانت عارف وش أسوي ووين أروح ؟ صعب أدخل تخصص بدون دراية مسبقة على الأقل ,

قررت وقتها الإنسحاب , وضاعت فرصة القبول في الجامعة , تعقدت الأوضاع .. وقررت إني أدخل معهد صحي في الباحة , وكان أكبر خطاء ارتكبته في حياتي .. مرت السنة الماضية وأنا في المعهد , للأسف المعهد كان مادي جداً , والتعليم يعتبر شيء ثانوي بالنسبة لهم , ما أستفدت من المعهد إلا شيء واحد بس , وهو الأصحاب الجدد ..
من جد , هم الحسنة الوحيدة والكيبرة من السنة الماضية , كسبت فيها أصحاب , ينحطون على الجرح يبرا

فكرت كثير بترك المعهد , وأرجع أقدم في جامعة الباحة لعلى وعسى , فكرت بأصحابي ؟ فكرت بعلاقتي معهم ؟ والحمدلله أتخذت القرار الصائب وسحبت ملفي وأعتمدت في القرار على العقل ولا على العاطفة , وقدمت ع الجامعة من جديد , وكان التقديم هالسنة مطور شوي طريق الأنترنت .. والآن صار عندي معرفة شوي بالتخصصات .. وصرت أعرف وش أختار و وش ما أختار ..
اخترت الرغبات كالتالي ( كلية الهندسة – كلية العلوم – وكليات أخرى لملئ الخانات فقط )
أرسلوا لي رسالة القبول , وكان القبول في كلية العلوم !
تحطمت شوي .. خصوصاً بأن تفكيري كان كله ع الهندسة .. كرهت الوضع الي كنت فيه جداً ..
لكن حمدت الله على كل حال .. وتفاجأة وقتها بقبول صديقي نايف في كلية العلوم أيضاً , ولكن تراجع نايف بالقرار
وفضل الإستمرار في المعهد الصحي

وجلست أنتظر تاريخ 14/10 , وهو أول يوم دوام جامعي حقيقي .. ومن قبل هالتاريخ وتقريباً من أول أيام العيد .. وأنا افكر
بـ ” نقطة تحول ” خصوصاً بعد إعلان برنامج الإعلامي سعود الدوسري :p وكنت حاس بأن في شيء بيغير كل شيء في حياتي بس متى وكيف و وين ؟!!
صار عندي هاجس كبير بأن حياتي لن تتغير إلا بهالنقطة !

وفعلاً , يوم 14/10 .. رحت أشوف الجدول والأوضاع الجامعية , وخصوصاً أن السنة التحضيرية في مبنى مستقل لجميع الكليات , وأيضاً الجامعة تختلف كلياً عن المعهد الي كنت فيه .. دخلت الكلية , كانت الزحمة عارمه , والمواقف ممتلئة , والدوريات تسترزق بالمخالفات مع صباح الخير ! , وحصلت المسؤلين يلعقون أسماء الطلاب وكلياتهم .. والجداول معلقه في جهة آخرى .. الأسماء كانت مرتبة في مجموعات , كل مجموعة لها رمز خاص .. والرمز هو رمز الجدول المحدد للمجموعة .
رحت على أسماء طلاب كلية العلوم , أحاول اقترب ولكن ما قدرت مع زحمة الطلاب .. دفيت عمري ودخلت في الزحمة أدور على أسمي , قريت الأوراق مرة ومرتين وثلاث .. وأسمي مو موجود !!
قلت في نفسي ممكن مع الزحمة ما انتبهت ! وأرجع أدور .. ولكن لا جدوى !

يااارب وش هالحظ ؟ جاني إحباط كبير كبير جداً ! فكرت أروح للإدارة .. فكرت بأشياء كثيرة .. ما عاد أدري وش أسوي ؟
ضاع من عمري سنة بدون فائدة علمية تذكر , وهالسنة الآن بتضيع ؟
وسبحان الله .. كنت بدخل للإدارة .. وأنا مار شفت أسماء طلاب الهندسة , فكرت شوي .. رغبتي الأولى كانت الهندسة !
من الممكن قبولني في الهندسة ؟! بس هم قبلوني في العلوم ؟! وسلمت ملف على أساسي إني من طلاب كلية العلوم ؟
قلق وتوتر فضيع .. أفكاري مو مرتبه ! لخبطة وزحمة الطلاب زادت التوتر أكثر وأكثر ..

المهم , قلت بأشوف الأسماء .. مع أني الأمل كان ضئيل شوي .. دورت دورت ..
كانت الزحمة عند الأوراق تبع أسماء طلاب الهندسة قليلة , ماكن في زحمة , خصوصاً بأن هالأورق نزلت في البداية !
والطلاب خلاص شافوا أسمائم وراحوا ..
ركزت في كل الأسماء .. أسم أسم ..
وفعلاً !! حصلت أسمي في ” كلية الهندسة “  !!
كل أفكاري وترتيباتي تغيرت !! يالله .. الحلم تحقق بعد العناء ؟!
ما استوعبت الموقف صح ؟! خفت يكون أسمي بالغلط ؟! سألت بعض المسؤلين .. وقالوا , لا أنت من طلاب الهندسة
حمدت الله وشكرته , وتذكرت ” نقطة التحويل ” الي حتى في تويتر تكلمت عنها , وانتظرتها كثيير ..
فسبحان الله تغير الحال من إحباط إلى تفاؤل كبير كبيير ..
وبعد ماخلصت أموري وأنا راجع البيت , شغلت مسجل السيارة وكان CD أجنبي منوع ..
تنقلت بين الأغاني ويوقع اختياري بالصدفة ع أغنية

In a moment, everything can change ا – HILARY DUFF
In a moment, everything can change,
Feel the wind on your shoulder,
For a minute, all the world can wait,
Let go of your yesterday

فعلاً في لحظة وفي أجزاء من الثانية , تغير كل شيء في حياتي للأفضل
ولله الحمد ونسيت السنة الي ضاعت والتعب الي ضاع معها .. ونسيت كل شيء أثر على حياتي سلباً
وقتها حسيت أن الأرض ماتسعني من الفرحة , وخنقتي العبرة !!

هذه التدوينة ادرجت بتاريخ 6 أكتوبر 2009 في الساعة 11:44 ص ضمن تصنيف بلا قيود. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.